Кодшо шуматкечын Йошкар-Олаште Российын кум регионжо гыч самырык гармоньчо да йоча калык семӱзгар ансамбль-влак погыненыт.
Нуным Марий тӱвыра рӱдер чумырен, тений кокымшо гана регион-влак коклаште «Изи гармоньчо» конкурсым эртара.
Тушко Марий Эл гыч 17, Пошкырт кундем гыч кум да Татарстан вел гыч кум гармоньчо, вич йоча семӱзгар ансамбль усталык таҥӱчашыш ушненыт. Ийготышт дене 9 ияш гыч 17 ияш марте улыт. Нуно марий самодеятельный композитор-влакынат, тыгак шке велысе калык семымат йоҥгалтареныт. Репертуарыштым, сценыште шкем кузе кучымыштым аклыше жюриште калыкыште пагалымашым сулышо семмастар-влак Сергей Речкин, Сергей Сергей Пчелкин да Николай Ермаков лийыныт.
Гармоньчо-влак коклаште сеҥыше-влакым ийгот шот дене кум категорийыште да семӱзгарым шокиаш тунемме кӱкшыт дене кок номинацийыште палемдыме.
Гармоньчо-влак коклаште кугу призым (гран-при) Марий Турек район Арбор тӱвыра пӧрт гыч Ростислав Васинкинлан кучыктымо.
Призшым – «Чайка» гармоньым – тудлан марий эстраде мурызо Йорга каче кучыктыш, коктын «Курорт» мурым калыкын совым рӱж кырыме коклаштак сылнын муралтышт. Рвезылан кумирже деч тыгай шергакан пӧлекым налаш – кугу куан.

9 – 10 ияш гармоньчо-влак коклаште ойыртемалтыныт:
I вер — Артем Ягодаров (Республикысе марий тӱвыра рӱдер. Вуйлатыше – Э.В. Петрова)
II вер — Богдан Тымбаршев (шкевуя семӱзгарым шокташ тунемше).
11-13 ияш-влак коклаште ешартыш шинчымашым пуышо педагог дене тунемше-влак:
I вер – Макар Бусыгин;
II вер – Михаил Сидоркин;
III вер – Иван Гаманюк.
Сеҥыше-влакын туныктышышт икте – тиде А.А. Ермаков, И.С. Палантай лӱмеш тӱвыра да сымыктыш колледж пеленысе йоча сымыктыш школын преподавательже.
11-13 ияш-влак коклаште шкевуя семӱзгарым шокташ тунемше-влак:
I вер – Иван Петраев (Башкортостан республик Калатаса район);
II вер – Юлиан Федоров (Татарстан кундем Балтаси район, вуйлатыше В.Ф. Федоров);
III вер – Иван Ороспаев (И.С. Палантай лӱмеш тӱвыра да сымыктыш колледжын калыкле сымыктыш гимназийже, вуйлатыше Д.Ф. Дузенко).
14-17 ияш гармоньчо-влак коклаште:
I вер — Максим Михайлов (Марий Турек район, Арбор тӱвыра пӧрт, вуйлатыше Г.С. Кутузов)
I вер — Никита Аликаев (Башкортостан республик, Благовещенск ола);
II вер — Кирилл Новоселов (Шернур район, Кукнур кыдалаш школ, вуйлатыше И.Г. Петрова);
II вер – Эрвин Морозов (Параньга район, Матародо школ, вуйлатыше С.В. Семенова);
III вер – Игнат Веткин (Шернур район, Полдыран ял, вуйлатыше А.В. Веткина).
Йоча калык семӱзгар ансамбль-влак коклаште кугу призым (гран-при) Волжский район Памар тӱвыра пӧрт пеленысе Яранцевмытын еш ансамбль логалын. Нунылан пӧлек шотеш акустик системым кучыктымо.

Ансамбль-влак коклаште сеҥыше радамыш лектыныт:
I вер – «Падыраш» йоча ансамбль (Республикысе марий тӱвыра рӱдер, вуйлатышеь Э.В. Петрова);
II вер – «Арбор тукым» гармоньчо ансамбль (Марий Турек район, Арбор тӱвыра пӧрт, вуйлатыше Г.С. Кутузов);
II вер – И. С. Палантай лӱмеш тӱвыра да сымыктыш колледжын гармоньчо ансамбльже (вуйлатыше А.А. Ермаков);
III вер – «Ончыкылык ӱшан» йоча семӱзгар ансамбль (Звенигово район, Красногорский йоча сымыктыш школ, вуйлатыше Ф.Р. Рубашкина).
Сеҥыше-влакым конкурсын гала-концертыштыже палемдыме. Тудо В.И. Ленин лӱмеш тӱвыра полатыште эртен, зал тич калыкым чумырен. Тӱвыра мероприятийым самырык гармоньчо дене пырля еш ансамбль, посна коллектив-влак сӧрастареныт. Теве Татарстан кундемысе Балтаси район Улисъял ял гыч Лада ден Виктор Федоровмытын еш ансамбль кумдан палыме, кундемыштышт эртыме кажне гаяк концертлан марий тӱсым пуртат. Оршанке район гыч Марковмытым, эн чотшо Романым, ончашак калык концертыш толеш, изи эргын гармоньым шокталтымыжым, муралтен-кушталтымыжым чон канен ончат да кумылыштым нӧлталыт. Сеҥыше радамыш логалше калык семӱзгар ансамбль-влакынат выступленийышт кугу кӱкшытыштӧ эртен.
Гармонь пайремын участникше ден унаже-влакым Тӱвыра, печать да калык-влакын пашашт шотышто министрын алмаштышыже Игорь Садовин, Кугыжаныш погынын вуйлатышын алмаштышыже Лариса Яковлева, Оньыжа, Кугыжаныш погынын депутатше Эдуард Александров, Марий тӱвыра рӱдерын вуйлатышыже Ирина Якаева саламленыт.
ФОТО ТЫШТЕ: https://vk.com/album-58959290_306565480
https://vk.com/album-58959290_306569193