Мероприятийым школ вуйлатыше Валерий Галкин поро тыланымаш дене почын. Марий-влакын калыкле-тӱвыра федерал автономийжын Советшын председательже Лариса Яковлева «Марий йоча муро» проект нерген каласкален. Марий тӱвыра рӱдерын вуйлатышыже Наталья Пушкина марий йылме дене йоча муро-влакым утларак возаш кӱлмӧ нерген ойлен.
Тунемше ден туныктышо-влакым Марий тӱвыра рӱдер пеленсе «Падыраш» йоча фольклор ансамбль ден «Юкече» вокал коллектив, Даниил ден Богдана Коротковмыт альбомыш пуртымо муро-влак дене палдареныт.
Тушко 15 марий муро пурен. Муро-влакын авторышт поэтессе-влак Лидия Иксанова ден Светлана Архипова улыт. Семым Светлана Яндукова келыштарен.
«Марий йоча муро» проектым Марий-влакын калыкле-тӱвыра федерал автономийже илышыш ФАДН-ын полшымыжо дене шыҥдара.
