Ӱярня – марий калыкын ик эн тошто пайремже. Тудо телым ужата, шошым вашлиеш, совет жапыште тудым «Телым ужатымаш» пайрем семын палемдыме. Кечышот почеш Ӱярня – куснылшо пайрем. Тудо Шорыкйол эртыме деч вара шым арня гыч пура, тений тудым 20 гыч 26-шо пургыжышто эртаралтеш.

Пайремым регионла гыч толшо фольклор коллектив-влак сӧрастараш тӱҥалыт. Нуно Патриарший площадьыште погынат да Чарла Кремль марте таҥ тошкалын ошкылыт. Палемдыман, Ӱярням тӱшкан, ожсо семын эртараш Марий Эл, Виче да Татарстан кундемы гыч усталык коллектив-влак лийыт.

Эр гычак  калык кидпаша мастар-влакын ярминга-ончерышт почылтеш.

Мероприятий шошын икымше калык йӱла пайремжым ончыктымо дене почылтеш. Ӱян арня жапыште мелна – унам вашлийме-ужатыме тӱҥ кочкыш. Пайрем годым команмелнамат, тыглай мелнамат тамлаш лиеш. Тыгак ӱячам, эгерчым, перемечым, тӱрлӧ кӧрган когыльым, ӱян туарам, шоҥешталтше пурам  ямдыленыт, уна-влакым сийленыт.

Курык гыч Ӱярня вара дене мунчалташ, калык модыш дене тӱшкан модаш лиеш. «Маскайол», шӱшкан ече дене мунчалташ йӧн лиеш. Шӱшкан ечыже тений у, чапле лиеш: Морко районысо Унчо кундемын кидмастарже Алексей Иванов марий тӱраным ямдыла. «Маскайолым» Оршанке районысо Тошто Крешын ялын кидмастарже Виталий Кудрявцев ыштен.

Тыгак йолгурыкышто ваш шогалын мунчалташ, курык гыч издер, кӱнчылавондо, тагына дене мунчалтен, «шуршым почкен» пайремыш толшо кажне еҥ кертеш.

Ӱярня пайремыш толаш кумылан усталык коллектив-влак деч йодмашым mari-centr_konkurs@mail.ru электрон адресыш 15-ше пургыж марте колташ лиеш.