Мер ушемын сомылжым умбакыжат волгалтарен колташ, самырык да бизнесмен-влак дене пашам виктарыше комиссийлам ыштыме. Мер ушемыш у еҥ-влакым ушымо. Тиде – Дмитрий Пайбулатов, Мария Иманаева да Ирина Казанцева.

Тыгак проект гоч мер пашам вияҥден колтымо нерген федерал кӱкшытан эксперт, «ГражданИн» фондым вуйлатыше Мария Жирова каласкален. Конгрессын сайтшын да соцкылыште лаштыклажым саемдыме шотышто мутланыме.

Мер ушемын погынымашыште Марий Эл Республикын Виктер вуйлатышын икымше алмаштышыже Михаил Васютин, Тӱвыра, савыктыш да калык-влакын пашашт шотышто министрын алмаштышыже Игорь Садовин лийынат да ойленыт.

Мер ушемым вуйлатыше Эдуард Иманаев конгрессын пашаште чулымлыкым ончыктышо меръеҥ-влаклан Таумутым кучыктен.