Теҥгече, 23 октябрьыште, Марий тӱвыра рӱдер У Торьял районысо тунемше-влакым  этно-урок программе дене куандарыш.

Тиде мероприятий-влак Т.И. Онар лӱмеш Токтарсола тӱҥ школышто, Кузнеч тӱҥ школышто да Совет Ушемын геройже М.В. Лебедев лӱмеш Немда кыдалаш  школышто эртеныт.

Этно-урокыштына тунемше-влак марий калыкын  поянлыкше: калык семӱзгар  (шӱвыр, тӱмыр), марий вургем (тошто марий, шернур, курыкмарий, киров да пошкырт марий), куштымаш, модыш да муро дене палыме лийыныт.

Кумылан йоча-влак шкеныштым тошто марий семӱзгар дене шоктымаште тӱмырзӧ семын терген онченыт, а мероприятийна йыр куштымаш дене мучашлалтын.