Таҥӱчашыш школышто, кыдалаш да кӱшыл профессионал туныктыш, ешартыш шинчымашым пуышо тӧнежлаште тунемше ден туныктышо, поэзийым да мурым йӧратыше да йоҥгалтарыше-влак ушнен кертыт.

Тудо сылнымут да семлык (музыкальный) кок номинаций дене эрта. Икымше номинацийыш ушнышо-влак В. Колумбын возымыжым лудыт, тыгак поэтын вес йылмыш кусарыме почеламутшо-влакым йоҥгалтараш тӱҥалыт. Вет уста марий поэтын возымыжым руш, эстон, финн да моло калыкын йылмыш кусарыме. Конкурсант-влак шке возымо произведенийыштымат сылнын лудын кертыт.

«Семлык» номинацийыште В Колумбын почеламутшылан возымо муро-влакым йоҥгалтыт, тыгак автор-шамычын мурыштымат мураш лиеш.

Конкурс ийготым шотыш налын иктешлалтеш. Сеҥыше-влак кеҥежым Морко районышто эртыше республик кӱкшытан конкурсышто шке мастарлыкым ончыктат.