Фестиваль Кугу сарыште сеҥымылан 78 ий темме да Марий талешке кечылан пӧлеклалтын, «Талешке корно» проект кышкарыште эртен.
Мероприятийым Марий тӱвыра рӱдер эртарен. Тудо 2018 ий гыч эртаралтеш.
Ончычсо ийла семынак тушто патриот шӱлышан, шочмо элым йӧраташ таратыше, илышым умылаш полшышо муро ден почеламут-влак йоҥгеныт. Фестивальыш 14 мурызо да 7 поэт ушненыт. Нуно руш да марий йылме шке возымышт але сар годсо муро дене палдареныт.
Мероприятийыш Сервис технологий техникумын студентше-влакат ушненыт. Дмитрий Иванов, Анастасия Кузнецова, Мария Ускова сар годсо да патриотик сынан муро композицийым ямдыленыт. Кугурак «изашт» – отставкысе подполковник Аркадий Курочкин. Аркадий Максимович тыгак шке поэзий кумылжым почын, ачажын сар корныжым шарналтен ойлен.
