Концертыште рӱдерын усталык коллективше да посна мурызо-влак сӧрастареныт. «Падыраш» йоча фольклор ансамбльын тӱмыр-гармонь дене марий такмак-влакым йоҥгалтарымыштым шӱшкен, совым кырен вашлийыныт. Изи мурызо Артем Ягодаровын йоҥгалтарыме «Гармоньчо лийнем» мурыжо кажнылан моткоч келшен. Рӱдерын ВК соцкылыш шындыме видеожым 3340 гана ончымо. «Чон оҥгыр» фольклор, «Сото вий» калык муро ансамбль-влак концертым шке выступленийышт дене сӧрастареныт. Нине коллектив-влакым Марий элын тӱвыран сулло пашаеҥже Эльвира Петрова вуйлата.

Рӱдер пелен «У муро» вокал студий да «Кас сем» вокал-семӱзгар группо пашам ышта. Тушко марий эстраде да бард муро деке кумылан еҥ-влак коштыт. Ийготышт дене тӱрлӧ улыт гынат, нуным икте уша – марий мурым калыклан лукташ. Валентина Булыгина, Людмила Конакова, Александр Мамаев, Майя Ахметьянова, Людмила Шой шке але марий поэт-влакын возымо пашаштым сценышке луктыныт.

Марий тӱвыра рӱдер Йошкар-Оласе тӱвыра да каныме рӱдӧ парклан пайрем концертым эртараш полшымылан таушта да ончыкыжымат паша кыл пеҥгыде лиеш манын ӱшана.