Тунемше-влакым Тӱвыра, печать да калык-влакын пашашт шотышто министерствын пӧлкажым вуйлатыше Михаил Чемышев, Марий тӱвыра рӱдерын директоржын пашажым жаплан шуктышо Василий Петров саламленыт, тунеммаште, мер пашаште сай лектышым тыланеныт.
Марафон Марий Элын шочмо кечыжлан пӧлеклалтын да Туныктышын да наставникын идалыкше кышкарыште эртен.
Вич район да Йошкар-Ола гыч 11 йодмаш пурен. Параньга район гыч кум школ гыч тунемше-влак уш-акылыштым тергаш кумылым почыныт. Тиде — Пумарий, Матародо да Параньга поселкысо тунемме тӧнеж-влак. Куженер район гыч Коҥганур, Руш Шой да Шӱдымарий школла гыч толыныт. Звенигово районысо туныктыш пӧлка Чакмарий школ ден Звенигово лицей гыч тунемшыже-влакым колтен. Тыгак Советский район Ӱшнӱр кыдалаш школын тунемшыже-влак кажне марафоныш ушнат. Пытартыш ийлаште Килемар район Арде кыдалаш да Тӱвыра да сымыктыш колледжын Национальный гимназийже гыч команде-влак кумылын толыт.
Йодыш-влакым марий шанчызе-влак Сергей Свечников Галина Шкалина, Виталий Михайлов ямдыленыт. Марий кундем дене кылдалтше лӱмло еҥ-влак , марий йылме да сылнымут, марий йӱла нерген йодыш-влак лийыныт.
Сеҥышыш «Арде вел» команде лектын. Килемар йоча-влак кожламарий йылме дене мутланат, сандене, умылышт манын,йодыш-влакым кусарыме.
Кокымшо верым Конганур школын «Чумбылат» командыже налын. Кумшыш Параньга районысо Матародо школын «Волгенче» командыже лектын.
Тунемше-влакым тыгай модмашыш ямдылымылан туныктышо-влаклан, школ директор ден районысо туныктыш пӧлка вуйлатыше-влаклан тау мутым ойлымо шуэш.
«Мунло» интеллектуал модмаш «2013-2025 ийлаште Марий Эл Республикын Кугыжаныш национальный политике» кугыжаныш программым илышыш шыҥдарыме кышкарыште эртаралтын.
