Республикысе марий тӱвыра рӱдер марий калыкын ик тӱҥ пайремжым Йошкар-Олаште Чарла Кремльыште 7 январьыште эртара. Тудо 11 шагатлан тӱҥалеш.

Тиде пайремым тӱрлӧ кундемыште тӱшкан илыше чыла марий палемда. Тӱрлӧ вере тудым шке семын лӱмдат. Теве Угарман велне Васли вады, курыкмарийыште Шачял, Волжский кундемыште Шорйол маныт. «Шорыкйол» мут мом ончыкта? Идалыкым иктешлымым ончыкта – Шочшо У ий, у жапын шочмыж нерген ойла. Тудын шочмо пагытше кече кужемме жаплан келшен толеш.

Пайремын тӱҥ сӧрастарышыже – васликува ден васликугыза, савуш, мӧчӧр-влак – дене пырля йӱлам радамым шукташ йӧн лиеш, модмаш, мужедмаш, мурымаш да куштымаш пайрем кас годым тендан чондам вӱчкаш тӱҥалыт. Тидлан Кремль кумдыкышто ныл шорыкйол алан пашам ышташ тӱҥалеш. Тӱҥ сцене Шорыкйол пӧртыш савырна, оза-влак уна-влакым, районласе да Йошкар-Оласе фольклор коллектив-влакым ожнысо йӱла почеш вашлийыт. Нуныжо калык пайремыш муро сийым кондат, шке кундемысе шорыкйол пайремыште эртарыме йӱла дене палдарат, «Шорык тага», «Шорыкйол капка пече», «Чыве кашта» модыш да мужедмашым эртараш посна алан-влак лийыт. Йоча-влаклан «Теле модыш алан» почылтеш. Пайремыште толшо-влакым кугезына-влакын йӱла ырым, пале-влак дене палдарат. «Кумыржат окса, шымыржат – окса» манын куштет гын, идалык мучко шийвундан лият. Шорыкйол арняште ӱдыр-влак вургемыштым тарватылыт, пуйто тыге ыштыме дене вургем налаш перке лектеш.

         Кузе Шорыкйол пайремым эртарет, туге идалык мучко илет, маныт. Сандене шонымашда да илыш кумылда ик кӱкшытыштӧ лийышт манын, 7 январьыште Чарла Кремльыш еш, родо-тукым, пошкудо дене пырля  погынен толза. Пагален вучена!