Эн ончыч пайремлан келшыше кочкышым ямдылат. Угинде пайрем деч вара, пакча сомыл иземмеке, ӱдырамаш-влак кидпаша дене шыже касым эртарат, а пӧръеҥ-влак пӧръеҥ сомылым шуктат. Палат: Шорыкйол маска-влак (Васлий кува ден кугыза але кара) сурт еда коштыт: сайын вашлият – сайым сугыньлен кодат.
Кызытат, олаште але ялыште эрта – тиде йӱла радам дене шукталт толеш.
Марий тӱвыра рӱдер тений 25-ше гана Шорыкйолым Йошкар-Олаште эртарыш. Эртарыме вер тӱрлӧ лийын: тӱвыра полатыштат, уремыштат – чыла вере йӱлам шот-рат дене шуктымо.
Пытартыш ийлаште рӱдер Чарла Кремльыште ятыр мероприятийым эртара. Теният 7 январьыште тудым республикысе 11 усталык коллектив-влакын полшымышт дене пырля, Шорыкйол пайрем йӱла да муро поянлыклан эҥертен ыштыме. Пайрем йӱла ойыртемым мужедмаш, муро да модыш-влак гоч почын пуымо, Марий Юмынйӱла рӱдерын Йошкар-Оласе общинын онаеҥже Юрий Тушнурцев кинде, погынышо калыклан еш перкем, шочшо у ийым икте-весым пагален илаш, тӱняште тыныслыкым тыланен ойлен. Шорыкйолын унаже-влакым Тӱвыра, печать да калык-влакын пашашт шотышто министрын алмаштышыже Игорь Садовин, Марий тӱвыра рӱдерын вуйлатышыжын пашажым жаплан шуктышо Василий Петров саламленыт.
13 январьыште Морко районысо Кораксола ялыште марий калыкын идалыклан тӱҥалтышым ыштыше пайремым эртарыме. Морко рӱдӧ клуб системыш пурышо Шале, Шордур, Кораксола тӱвыра пӧрт-влак, Марий Кужер ялысе клуб пеленсе фольклор ансамбль-влак ял калыкын полшымышт дене йӱлалан поян Шорыкйолым эртарен колтымо. Пайремым сӧрастарыше мӧчӧр-шамыч Казань, Йошкар-Ола, Морко районын вич кундемже да райрӱдыжӧ гыч толыныт. Урем дене гармонь-тӱмыр йӱк дене, мурен-куштен, ял мучко каеныт.
Мӧчӧр-влакым Соня ден Саня Кирилловмыт еш моткоч порын вашлийын.
Кудвечыште вате-марийын ыштыме, тӱрлымӧ, пидме кидпашаштым ончер семын погымо. Курчак сӱан ватыжак лу утла ыле! А озаватыже тынар межноским пидын оптен, ӧраш веле кодеш. Кӱвар шартышыжат кум-ныл ӱдырым марлан пуаш сита. Эсогыл кочкыш йӧрварым пидын келыштарен, лум ӱмбалне «ӱстелым» поген. Тынар кидпаша! Тек нунын мастарлыкышт у идалыкыште кажне суртлан пример лиеш.
Кирилловмыт денак шорыкйол мужедмаш эртен. Ӱдыр-рвезе, яра вате-шамыч вӱташте чывым кученыт, могай марийлан марлан лекмыштым мужедыныт. Капка гоч портышкемым кышкен, кудо велкыла марлан кайымыштым але удырым налмышытым рашемденыт. Вуеш ведрам чиен, кум гана йыр пӧрдын савырнымеке, капка гоч лектыныт гын, тений ешым поген кертыт. Ешым погымо шотышто палым ончыктышо мужедмашым печым кученат эртарыме.
Чылажат оҥайын, веселан, йӱла мурым йоҥгалтарыме почеш эртен.
Варажым тӱвыра пӧртыштӧ кугу концерт лийын. Марий тӱвыра рӱдер пайремыш толшо кажне йочалан, мӧчӧр лийше-влаклан пӧлекым кучыктен.
Палемдыман, «Шорыкйол» пайремым марий-влакын курым илыме кажне регионышто, посна районышто да ялыште эртарыме.
Шукырак фото: https://vk.com/album-58959290_300933752, https://vk.com/album-58959290_301042412
