Вашлиймашке Звенигово районысо школлаште марий йылмым да сылнымутым , руш йылмым да ИКН-ым туныктышо-влак толыныт, школын тунемшыже ден туныктышыжо-влакат лийыныт. Уна-влаклан школым вуйлатыше Владимир Кашков краеведений тоштер дене палымым ыштен, Чап да шарнымаш Залын экспонатше, Чакмарий кундемым чапландарыше еҥ-влак нерген, нунын илыш да сарзе корнышт нерген кумылын каласкален.

Вашлиймаште  Марий Элын калык писательже, драматург да журналист Л.Л. Яндаковын «Ший калык» книгаже негызеш марий калыкын эртыше пагытше, вияҥме корныжо да кызытсе илышыже нерген чон почын кутырымаш лийын. Мутланымашым Марий тӱвыра рӱдерым вуйлатыше Василий Петров почын, ойыртемалтше икмыняр еҥлан Таумутым пӧлеклен. Мутланымашке Марий Элын культурын сулло пашаеҥже да журналист-влак Борис Шамиев ден Вячеслав Кольцов ушненыт, писатель дене пашам ыштымышт, журналист сомылышт нерген порын ойленыт, видеопрезентаций гочат «Ший калык» книган ойыртемалтше тӱсшым, марий калыкын молан шийым, а вес металлым огыл, йӧратымыштым почын пуымо.

Мероприятийын тӱвыра программыжат поян лийын. Морко калык театр леонид Яндаковын «Пусаксолаште томаша», С. Чавайнын пьесыла гыч ужаш-влакым ончыктеныт. Марий тӱвыра рӱдерын усталык коллективше муро пӧлекым ыштен. Гармоньчо да мурызо Олег Бакутов мурыжо дене куандарен. Морко район гыч «Музыкальная шкатулка»  йоча ансамбль сылне мурым йоҥгалтарен.

Мероприятийым Марий тӱвыра рӱдер ден «Мари ушем» регионысо мер организаций эртареныт.