«Ӱярня» йоча пайрем 11 шагатлан тӱҥалеш. Пайремыш Параньга, Советский, У Торъял, Волжский да Морко районласе индеш школын командышт толыт. Нуным оҥай программе вуча: «Ӱярня мелна», «Ӱярня кува», «Ӱярня» конкурса-влак да такмак баттл.

Тошто марий пайремын ю виян шӱлышыжым йоча-влак уремыште тӱрлӧ марий модмаш гоч пален налыт. «Шукыйол», «маскайол» дене таҥасаш тӱҥалыт, курык гыч издер, волак, ӱярнявара дене мунчалтат, калык модыш-влак дене модыт.

Конкурслаште сеҥыше-влак диплом да шергакан приз дене палемдалтыт.

Мероприятийым Республикысе марий тӱвыра рӱдер Морко районысо тӱвыра пӧлкан, Унчо кундемысе верысе администрацийын, школын, тӱвыра тӧнежын да «Передовик» ял озанлыкын полшымышт дене эртара.