Кызытсе жапысе талешке-влак мемнан коклаште илат: элыш аралымаште пеҥгыдын шогат, калыкна верч тыршат, самырык-влаклан, кушкын шогышо тукымлан пример семын кодыт. Тыгай еҥ-влак нерген утларак пален налаш «Ший талешке» республикысе конференций полша. Тушко школлаште тунемше ден туныктышо, кыдалаш да кӱшыл школласе студент, патриотло клуб да ушемын воспитанникышт ушнен кертыт.

Шымлымаш пашаштлан нуно кок темым налын кертыт. «Кызытсе талешке мемнан коклаште» номинацийыш посна сарзе операцийыште лийше да улшо-влак нерген возен кертыт. Тыгак моло сферыште тыршыше-влак нергенат сераш лиеш.

Кокымшо тематике Ешын идалыкше дене кылдалтын: «Еш – мыйын эҥертышем» шымлымаш паша туныктымаште, тӱвыраште, шанче да волонтер да моло пашаште сеҥымашыш шушо еш нерген лийшаш.

Таҥӱчашыш ушнышо-влак шке пашашт дене 7 минут наре жапыште палдарышаш улыт. Материалым марий йылме дене возыман. Пашам шкетынат, тӱшканат возаш лиеш. Кажне номинацийыш ушныман, но ик паша гыч веле пуаш лиеш. Тидым 18 апрель марте ыштен шуктыман да адресу mari-centr_konkurs@mail.ru электрон адрес дене колтыман.

Кажне номинацийыште, ийготым шотыш налын, сеҥыше-влак I, II, III степенян диплом дене суапландаралтыт.

Мероприятий Марий Эл Республикын кугыжаныш национальный программыжым илышыш шыҥдарыме кышкарыште эртаралтеш.