Конкурс кум ужаш гыч шога. Участник-влаклан «Мый марий рвезе улам» визиткым ямдылыман. «Вий, проворлык да арвий» конкурсышто кид-йол усталыкым, вий-арым, этнографий шинчымашым ончыктышаш, сарзе-патриотик сомыллан ямдылалтмашышт дене палдарышаш улыт.
Кумшо заданий – тукым гыч тукымыш куснышо еш йӱла але калыкын йӱлаже дене палдарымаш.
Йодмашым mari-centr_konkurs@mail.ru электрон почто дене 19 апрель марте колтыман.
«Марий патыр» республикысе конкурс 25 апрельыште «Марий сийгудо» рестораныште эртаралтеш. 16 шагатлан тӱҥалеш.
Мероприятийым Марий тӱвыра рӱдер Тӱвыра, печать да калык-влакын пашашт шотышто министерствын полшымыж дене эртара.
Палемдыман, «Марий патыр» таҥӱчаш кокымшо гана чумырга. Икымше конкурс 2021 ийыште кандаш чолга рвезым ушен. Сеҥышыш Провой кундем Юлъял села гыч, марий талешке Пашканын илыме кундем гыч, Анатолий Мартынов сеҥен.
