Пайрем касым верысе тӱвыра пӧртын пашаеҥже-влак ямдыленыт. Пашканын илыш корныжым, шочмо мландым да шочмо калыкым аралымаште надыржым шарналтеныт. Тыгак кундемыште шочшо, паша да элым аралымаште порысыштым шуктышо еҥ-влак ятырын улыт. Кызытат шочмо элнан тичмашлыкшым аралымаште пеҥгыдын шогат. Тидын нерген Звенигово районысо ветеран-влак ушемын енже-влак шарналтен каласкаленыт.

Марий тӱвыра рӱдерын директоржо Василий Петров Марий талешке кече дене саламлен, кызытсе талешке-влакын элнан тичмашлыкым аралымаште пенгыдын шогышо землякна-влаклан гуманитар полышым пуымо нерген каласкален. Рӱдер да «Мари ушем» мер организаций шукерте огыл гумполышым наҥгаеныт. Нунын дене пырля марий профессионал мурызо да композитор Светлана Яндукова ден салтак-влакын «Батя», Олег Бакутов, миеныт, госпитальыште да передовойышто, блиндажыште, концерт программым ончыктеныт. Шке возымо да Кугу Ачамланде сар жапыште возымо «Катюша» мурымат йоҥгалтареныт, боец-влакын кумылыштым нӧлталыныт. Тидын нерген Светлана Яндукова погынышо-влаклан каласкален, гармоньчо Эльвира Петрова дене калык да шке возымо мурылаштым пӧлекленыт.