Тушко чылаже 70 наре еҥ ушнен. Нунын коклаште 10 утла национальностян, тӱрлӧ ийготан еҥ-влак лийыныт: руш, татар, узбек, француз, марий ача-аван олаште илыше йочаже-влак. Сертификатым 56 еҥ налын. Нунын кокла гыч икмынярынже иканаште кокытым налыныт, молан манаш гын «тунемаш тӱҥалше» да «тунеммашым умбакыже шуышо» кок тӱшкаштыжат шинчымашым налаш кумылышт лийын. Профессий да пашам ыштыме кӱкшыт гыч ончалаш гын, тунемше-влак тӱрло сферыште тыршат: министерстве-влакын пашаеҥышт, пенсионер улыт, экскурсовод-влаклан йылмым да тӱвырам палымаш турист-влак дене вашлиймаш годым моткоч кӱлеш. Тыгак посна сарзе операцийыш гуманитар полышым наҥгайыше-влакат марий йылмым тунемаш кумылыштым почыныт.
Тунемме программе оҥайын ышталтын. Тушто тыглай теорий урок-влакым веле огыл, тӱрлӧ мастер-классым, экскурсийым, тыглай илышыште марла мутланыше еҥ-влак дене вашлиймашым эртарыме.
Сертификатым пуымо годым кажне тунемше марла тауштен, йылмым палыме кӱкшытшым ончыктен. Тидыже курсым вӱдышӧ-влак Лидия Иксанова ден Валерий Максимовын пашаштлан кугу ак.
Марий йылмым яра туныктымо курсым Марий Элын Тӱвыра, савыктыш да калык-влакын пашашт шотышто министерствыжын полшымыж дене «Мари ушем» мер организаций эртарен. Сертификатым кучыктымаште республикысе тӱвыра, савыктыш да калык-влакын пашашт шотышто министрын алмаштышыже Игорь Садовин лийын да саламмутым каласен.
