«Ош куэр» ото Шернур да У Торъял кугорно ушнымаште верланен. Тиде отышто кумалтыш вич ийлан ик гана эртаралтеш, пытартышыже 2008 ийыште лийын да ятыр марий калыкым Марий Эл, Башкортостан, Татарстан, Киров, Пермь, Ленинград, Моско кундемла гыч чумырен. Кумалтышыште шуко марий онаеҥ-влак дене вашлийын мутланаш лиеш.

Икымше гана кумалтышыш тарваныше-влаклан изирак ой каҥаш: кумалтыш кече деч ончыч мушкылтын, яндар ош вургемым чийыза. Чесым ямдылыза, сортам пӱтырыза. Чыла ямдылымеке сортам чӱктыза да «Ош поро кугу юмо, кумалтышна шотлан толшо лийже»  манын пелештен кумалтышыш кайыза. Пырля  мелна-туара, кинде, пура, сорта, шийвундым налза. Кӱсотыш пурымо деч ончыч капка ончылно вуйдам савалтыза, кид ден шӱргыдам, кондымо шийвундым шӱялтыза. Отыш пурен, кондымо чес-пӧлекдам шке солыкеш ужар шаге ӱмбаке шындыман. Сӧрымӧ пӧлек семын кӱсотыш шовычым, тувырым, носким кондат. Онаеҥ деке лишемын юмо деч мом йодын толын чыла раш каласен пуыман.

·       Отышто уто йӱк-йӱаным лукман огыл, шкем икшырымын кучыман.

·       Отышко пурымо годым сото телефоным йӧрыктыман

·       Ӱдырамашлан вуйсолыкым, шовычым пидман. Шке шумо жап годым ӱдырамашлан отышко толаш ок йӧрӧ. Ару кап-кылан, ару вургеман лийман.

·       Отышко осал шонымаш дене пурыман огыл, шке шонымет шкендым темдалеш.

·       Шӱкшакым кышкен кодаш ок йӧрӧ.

·       Аракам подылшо мияш огеш лий. Аракам намияш ок йӧрӧ.