Теҥыз деч 300 метр кӱшнӧ верланыше отышто пытартыш гана кумалтыш 2008 ийыште лийын. Вич ий жапыште тушто ятыр пушеҥге кошкен, шогалтен кодымо пырня-влакшат шӱйыныт, садлан эрыктымаш паша кӱлын. Тиде сомыллан Куженер да Советский районысо «Марий кумалтыш» погынын еҥже-влак пижыныт да кумалтыш кечылан отым яндарын эрыктен шогалтеныт, Марий Эл Виктемат шийвундо дене полшен. «Тӱвыра наследий» республикысе программе почеш отылан 77 тӱжем окса ойыралтын.
Кумалтыш вич тулолмо дене эртен: Ош Тӱҥ Кугу Юмо, Шочынава, Мландеава, Кугырак, Мер Юмо. Марий-влак ешлан пиалым, тазалыкым йодыныт. Лийыныт коклаште тӱрлӧ еҥат: иктыже таум ышташ «чонан дене» лийын гын, весыже Юмо деч полышым йодын. А теве Омск олаште илыше ик самырык ӱдыр чонжо йодмо почеш толын, ожно кочаже карт лийын. Тудынат ынде кумалтышыш чӱчкыдынрак мияш кумылжо лектын.
