30 октябрьыште черетан самырык-влакын каныме кас «Спорт — мемнан йолташна!» темылан пӧлеклалтын.
Кас тӱҥалтыште ӱдыр-рвезе-влак марий лӱмлӧ спортсмен-влак нерген йодышлан вашмутым пуэныт. Поснак эрге-влак тиде йодышышто тале лийыныт. Нуно тыгай лӱм-влакым шарненыт: Олег Токтаров — правил деч посна универсальный кредалмашын чемпионжо, Вячеслав Быков — хоккей дене Российын ончычсо тӱҥ тренерже, Алевтина Танерова — биатлонистка, Куженер могырым Тумьюмучаш гыч, Алина Прокопьева — Озаҥыште эртыше Универсиадын кок гана ший медаль призержо, шочынжо Морко район Арыныште, да молат.
Мероприятийыште толшо-влакым «Universalcrew» брейк-данс дене куштышо группо шке мастарлыкышт дене ӧрыктареныт. Тыгак сылне йӱкан самырык мурызо Виктория Тихонова калыкым куандарен.
Каныме касыште ӱдыр-влакат чолгалыкым ончыктеныт — нунын коклаште мини-футбол дене таҥасымаш эртаралтын. Кузе нуно мече почеш куржталыныт, кузе тарванылыныт да юарленыт, шуко еҥын кумылым нӧлтен.
Сеҥыше-влак шергакан пӧлек дене палемдалтыныт.
