Фестивальыш миен коштмо нерген Марий тӱвыра рӱдерын пашаеҥже Лариса Сидоркина каласкала:

«Тыгай марий пайрем-влак ӧрдыжтӧ илыше марий-влаклан моткоч кӱлешан улыт, тыште марий йылмынан лывыргылыкше, моторлыкшо, коеш; икте-весе ден порын шыргыжалын, кутыралтен колтен, йылмынан сӧраллыкшым шижын кертына; кажне айдеме шке йылмыже ден кутыра гын, йылмына тӱзлана, ончыкымат илаш тӱҥалеш манын ойлыш Марий тӱвыра рӱдерын вуйлатышыже В.П. Григорьев.

Тиде гана фестивальыш икмыняр регион гыч ансамбль-влак погыненыт: Киров кундемын «Поса кундем», Старокраино гыч «Ший онгыр», Шаранге гыч «Пеледыш», Ошарский гыч «Цевер кеце», Тоншаево гыч «Мӧр пеледыш» фольклор ансамбль да «Скоморошина» йоча ансамбль. 

Сценыш лекмекем ӧрынат колтышым: зал тич калык, шинчаш вер уке. Эсогыл чонланат моткоч куштылгын чучо: тынар шукын погыненыт гын, марий калыкын рӱдыжӧ эше ила. «Миялал шинчын» марий калык мурым йоҥгалтарышым, «Каче-влак» группа «Марий улына» такмак-шамыч дене ончаш толшо-влакым куандарышт.

Фестивальын программыже мучашлалтмек, икмыняр кова-влак мемнан деч эше икмыняр мурым муралташ йодыныт, тыге, жапым шуйкалыде, нунын йодмыштым шуктышна, «Каче-влак» группа дене пырля пел шагаташ концертым ончыктышна.

Фестивальын организаторжо-влаклан: О. А. Комаровалан, Е. М. Новиковалан, Н.А. Юдинцевалан — пеш кугу таум каласыме шуэш».