«Нягань ола моткоч самырык — улыжат тудлан  15 ий веле. Калык дене кутыралтен налмеке, пален нална, тыште Марий Эл Республик гыч 200 утла еҥ паша ышташ толын. Утларакшым Провой, Морко, Марий-Турек районла гыч, Татарий, Урал, Эрвелмарий гыч толшо марий-влак илат. Автономийым вуйлатыше В.О. Третьяков мемнам — Марий Элын калык артистше З. Берниковам да эстраде мурызо Л. Сидоркинам — мӱндыр мландыш толын шумо дене шокшын саламлыш, концерт программым ончаш темлыш. Мучашлан чыланат ик кугу оҥгыш шогалын келшымаш куштымашым куштышна. 

Мероприятий мучашлан Нягань олан депутатше да главаже  Р.К. Дакукина залыште улшо калыкым  марий автономийым почмо дене шокшын саламлыш. Марий Эл Республик Виктер вуйлатышын алмаштышыже, тӱвыра, печать да калык влакын пашашт шотышто министр М.З. Васютинын саламмутшым кумыл дене лудын, автономийым  вуйлатышылан кучыктышым.

Тыге икте-весе дене кыл шочо. Тек тӱҥалме пашашт кӱжгӧ лектышан лиеш, тек Нягань олаште илыше марий калык пиалан лиеш».