Ӱярням чыла марий-влак пайремлат. Тиде — телым ужатыме да шошым вашлийме пайрем.
Ӱярня Шорыкйол пайрем деч вара, шым арня эртымеке толеш. Пайрем шочмын пура да ик арня шуйна.
Ӱрня годым чыланат моторын чияш тыршеныт: ӱдыр-влак йытыран йолым пидыныт, ужгам чиеныт, мотор пеледышат шовычым пидыныт.
Ӱярнян икымше кечыже кумалмаш гыч тÿҥалеш. Эрден эрак коҥгаш олтат, мелнам кÿэштыт, ушкал ÿй дене ÿйлат, ÿмбала-ÿмбала оптен шындат. Мелна кышыл воктене атеш шокшо шöрым шындат, тушко ушкал ÿйым пыштат, пурам ямдылат. Пайрем ӱстел шуко тӱрлӧ кочкышлан поян лийын. Ӱстел ӱмбаке погымо сий толшаш идалыкыштат тыгаяк поян лектышым сӧрен.
Пайремын кокымшо кечыже курык гыч мунчалтымаш гыч тÿҥалеш. Кугезына-влак тыге чер деч аралалтыныт, у куатым чонышкышт налыныт. Ӱдырамаш-влак курык гыч мунчалтен волымышт годым лумышко кыне кычкым, шурным йоктареныт. Тыге нуно сай шурно лектышым налаш шонымо кумылыштым ончыктеныт. Кӱшкӧ кыне кушшо манын, курык гыч эн торашке мунчалтен волыман улмаш.
Йолкурык ышташ лӱмынак чодыра гыч ломашым конденыт, сайын локшинчын, кок могырын радам дене кӱшыч ӱлыкӧ оптеныт, чыла йӧнештарымек, вӱдым шавен ияҥденыт.
Кумшо кечын имне дене кудалыштмаш эрта. Кӧн имньыже лийын, терым сӧрастарен, пӱгыш оҥгырым сакалтен ял йыр кудалыштыныт. Терыштыже рвезе-ӱдыр-влак, шӱвырзӧ, гармонист шинченыт. Оҥгыр йÿк осал осал шӱлышым поктен колтымо семын умылтаралтын. Вара имне дене таҥасеныт. Сеҥышылан шöрмычым але коваште гыч пунымо солам пöлекленыт.
Вара кок-кум кече мÿндырнö илыше родо-шочшо деке унала коштыныт, каныш жапым клубышто концертым але спектакльым ончен эртареныт.
Шымше кечын пайремым ужатеныт. Мончаште мушкылтын да ырен, могырыштым кандареныт. Пайрем эртарыме верым сылнештареныт, сийым— пурам, мелнам, перемечым, ÿячам— погеныт. Толшо-влакым ÿдыр-влак, мурен-мурен, пура дене сийленыт.
Ӱярня арнян пытартыш кечынже Ӱярня ден чеверласыме йӱла эртаралтын. Тиде кечын пайрем годым погынышо шӱкым поген, варашке уржа кылтам келештарен йӱлалтеныт да «Ӱярня каен!» манын кычкыреныт. Самырык ӱдыр ден рвезе-влак тул ӱмбач тӧрштылыныт.Тулото деч вара кодшо ломыжшым нурышко наҥгаен шавеныт.
