Зиновий Краснов — 1960-1970-ше ийлаште марла серыше-влак кокла гыч ик эн шкешотан да ойыртемалтше усталыкан автор. Ӱмыржӧ самырыкнек кӱрлалтын гынат, марий  калыклан суапле сылнымут надырым коден. Илымыж годым «Тымык эрдене»,»Кӧранем» да «Йошкар сӱрет» сборникше-влак гына лектын шуктеныт, уке лиймекекыже «Мо тугай    почеламут?» да «Тау, Рина» книгаже-влак савыкталтыныт. Ятыр возымыжо газет да журналлаште  аралалт кодын.

 З. Красновым  ме чапле лирик семын, куатле да кӱдыралтле шомак дене возен моштышо поэт семын аклена. Калык коклаште поснак «Шӱмеш кодшо окна», «Шонанпыл», «Муро-  мыскарам мурем», «Тиде корно-поро» да моло мурыж дене палыме. Тудо – чылаже 35 мурын авторжо. Мурыжо-влак калык коклаш писын шарленыт.

 «Пиал – илаш айдеме верч» книга марий сылынымутым пагалыше-влаклан пӧлеклалтын да сылнымут мастар Зиновий Красновын 70 ияш лӱмгечыжлан савыкталтын.