27 февральыште Республикысе марий тӱвыра рӱдерым вуйлатышын алмаштыже Римма Юрьева Мер Каҥаш вуйверын погынымаштыже участвоватлен. Тушто икмыняр йодышым каҥашеныт: Марий Турек районысо Мер Каҥаш активын паша лектышыже; Марий Элын районлаште марий йылмым туныктымо паша; Марий форум: шошо сессий, пленумым ямдылыме да эртарен колтымо , тыгак Пеледыш пайремым кунам да кузе эртарыме нерген.
Пеледыш пайрем нерген йодышым кумданрак вес вуйверыште да посна оргкомитетыште каҥашаш тӱҥалыт. А кызыт эн ончычак Марий Турек районысо Мер Каҥаш активын паша лектышыж нерген мутланеныт. Ты шотышто Мер Каҥашын еҥже Зинаида Батуева докладым ыштен. Тудо тӱҥшотышто район школлаште марий йылмым тунемме нерген ойлен: тушто 14 школ уло, 436 туныктышо тырша да кок тӱжем утла йоча тунемеш. Кум школышто марий йылмым шочмо йылме семын тунемыт, моло школышто – кугыжаныш йылме семын. Ныл йочасадыште шочмо йылме дене мутланат. Кум школышто татар йылмым да Карлыган школышто одо йылмым тунемыт.
А кокымшо йодыш дене теве мом палемдышт: таче марте Мер Каҥашын еҥже-влак кум школышто – Шернур Лажъялыште, У Торъял Кузнечыште, Марий Турек Сардаляште – лийыныт. Кеҥеж марте чыла районым авалташ да иктешлыше мероприятийым эртараш шонат.
Тений Мер Каҥашын шошо сессийже молгунамсе семын апрельыште огыл, а 27-28 мартыште лиеш да Российын тӱрлӧрегионыштыжо илыше марий-влакын йодышыжлан пӧлеклалтеш.
