Тыгай пайремын тӱҥ шонымашыже: калыкнан йӱлажым тукым гыч тукымыш шуен толаш, олаште илыше марий йочалан шочмо йылмын кӱлешлыкшым умылтараш, тыгак йырым-йыр моло йылман икшывымат чумыраш да нуныланат шке тӱвыраштым палаш кӱлмӧ нерген шижтараш. Садланак йоча Ӱярня чылт марий йылме дене эртен, но, чаманен каласаш логалеш, ятыр гана рушлат умылтараш пернен. Тидыже – туныктышо-влаклан шоналташ!

Пайремышке Йошкар-Оласе кандаш школ (1-ше, 2-шо, 7-ше, 14-ше, 21-ше, 27-ше, 29-ше, 30-шо) гыч 100 утла йоча ден марий йылмым туныктышо-влак чумыргеныт. Нуно тӱрлӧ калык модыш дене модыныт, шкештат южо модышыж дене ваш-ваш модаш туныктеныт. Теве «Эн сай модыш»  конкурсышто 2-шо №-ан школ сеҥышыш лектын. Йоча-влак «Ӱярня» модышым ончыктеныт, да тыгодымак чылаштым иктыш ушен, пырля модыктен моштеныт.

Тунамак «Ӱярня курчак» конкурс лийын. Кажне школ шке курчакшым сӧрастарен конден. Ты конкрусышто 1-ше №-ан школ сеҥен.

Икшыве-влак кондымо мелнашт денат икте-весыштым, уна-влакым сийленыт. Тыште организатор-влак кажныштым Таумут да книга пӧлек дене саламленыт, а конкурслаште сеҥыше-влаклан Чаптанык ден «тамле» пӧлекым кучыктеныт.

Йоча Ӱярня пайремым моткоч чолган Марий кугыжаныш университетын студентше-влак вӱденыт. Кристина Иванова ден Владимир Аптулаев тӱрыс программым виктарен шогеныт гын, Людмила Фёдорова ден Регина Алексеева теле ден шошо роль-влакым модыныт. Ты мероприятийым кӱлеш семын эртарымаште кугу пашам шуктен Республикысе марий тӱвыра рӱдерысе тӱшка паша шотышто пӧлкам вуйлатыше Людмила Кошкина. А тӱвыра рӱдерынак методистше, мурызо Лариса Сидоркина марий муро дене кумылаҥден.

Тиде сай сомылым умбакыже шуйыман да республик кӱкшытышкат лукташ кӱлеш.