Икымше кечын Ӱярня пайрем Тӱвыра пӧрт ончылно тӱҥале. Кинде-шинчал, мелна кышыл дене калыкым вашлийыч, модыш-влакым эртарышт, марий сем почеш куштыктышт. Вара программе пӧрт кӧргыш кусныш – чумыргышо-влак умбакыже кап-кылым лывыртышт. Тыге касым фольклор ансамбль-влак – Киров кундем Кильмезь гыч «Марий сем», Марий Эл Советский посёлко гыч «Кугезе кумыл» да Йошкар-Ола гыч «Чон оҥгыр» — сӧрастарышт. Шке тамым пуртышт Ӱярня кува (Лариса Сидоркина) ден Ӱярня кугыза (Эдуард Яковлев) герой-влак. Нунак тӱрыс программым вӱдышт.

А рушарнян моткоч шуко калык Патриарший площадьыш толын. Тушто 11 шагат эр гычак ончер-ужалымаш пашам ыштен: тӱрлӧ мастар еҥ сылне деч сылне пашажым калыклан темлен, кочкыш йӧрварымат налаш лийын. Чаманаш логалеш, мелнам гына шагал ужаленыт.

Тиде кечын руш да марий калык модыш-влак дене модыныт, курык гыч мунчалтеныт, марий-руш концертым онченыт. Калык кумылым нӧлтеныт «Марий сем» (Киров кундем Кильмезь) ден «Ший аршаш» (Кужэҥер район Токтайбеляк) фольклор ансамбль-влак, «Мурпеледыш» (Параньга район Усола) мурышо калык ансамбль, «Каче-влак» группо, мурызо Лариса Сидоркина да молат.

Пайремым руш да марий вӱдышӧ-герой-влак моткоч сылнын да ик шӱлыш дене вӱденыт.

Мучаште, чыла осалым иктыш чумырен, Ӱярня курчакым йӱлатеныт.

Саман вашталт да уэм толеш гынат, илышыштына йӱлалан посна вер эре лийшаш, тыге ме шке чурийнам, койыш-шоктышнам арален кодена. А тӱрлӧ калыкын пайремым пырля эртарымыже умбакыжат келшен илаш, икте-весе коклаште кылым пеҥгыдемдаш полша.