Оналмаш Валерий Мочаев «Шарнымаш сорта» акцийым тений кузе эртарен колтымо нерген каласкален. Молгунамсе семынак 26 апрельыште Мер Каҥашын да мер организаций-влакын чолга еҥышт талешке-влакын памятникышт да чап оҥашт воктеке лектыт, пеледышым пыштат, сортам чӱктат.

Вуйверыш чумыргышо моло еҥат Талешке кечым эртарыме шотышто шке темлымашыжым ешарен. Тыге «ВийАр» ушем сылнымут флешмобым эртара. Марий тӱвыра рӱдер икмыняр организаций дене пырля «Мый марла ойлем» акцийым умбакыже шуя да молат.

Эксперт совет-влак шотыштат мутланымаш келге лийын. Теве Марий калык мер толкын Уставын проектшым ямдылыме шотышто эксперт советым ыштыме. Вес совет Марий Эл Республикыште марий йылмым тунемме пашам шымла.