Марий блоггерын школыштыжо 17 гыч 46 ияш марте 19 еҥ лийын. Тиде – Марий Элысе ссуз ден вузлаште тунемше студент-влак, Морко, Шернур да Оршанке районла гыч библиотекарь ден туныктышо-влак.
Школым почмашке ты мероприятийым эртараш полшышо еҥ-влак толыныт. Саламлымаш мутым Марий кугыжаныш университетын ректоржо Михаил Швецов, «Ростелеком» ОАО-н Марий Эл Республикысе филиалжын коммерческий директоржо Александр Дудин, Республикысе тӱвыра, печать да калык-влакын пашашт шотышто министерствын калык да конфессий-влак кокласе кыл шотышто пӧлкажым вуйлатыше Игорь Садовин, Республикысе марий тӱвыра рӱдерым вуйлатыше Валерий Григорьев, Мер Каҥаш президиум исполкомын еҥже – Марий Эл Кугыжаныш Погын председательын алмаштышыжын полышкалышыже Александр Петров ойленыт. Нуно мероприятийын кӱлешан да пайдале улмыжым палемденыт.
Школын паша радамже поян да тӱрлӧ шӧрынан лийын. Семинар-тренингын тӱҥ чумырышыжо — «Интеллектуал» тӱвыра-увер рӱдер да проектын авторжо, марий блоггер, этножурналист, Республикысе марий тӱвыра рӱдерын увер вияҥмаш да вашкыл пӧлкажым вуйлатыше Эльвира Куклина школышто тӱрлӧ теме дене вашмутланымашым темленыт: тыште шке блогым почаш верым ойырен налме гыч тӱҥалын, тудым ончыко вияҥдыме да тудын полшымыж дене оксам ыштен налме йодыш марте темым каҥашеныт.
«Шке блогым да сайтым почмашын шонымашыж ден йӧнжӧ-влак» теме дене икымше мастер-влассым Марий Элысе вӱдышӧ блоггер Михаил Винокуров эртарен. Палемдаш кӱлеш, тудо республикыште ик эн ончыч шке блогшым почын, тудо ынде лу ий утла пашам ышта.
Семинар-тренингыш толшо-влак тыгак Илыше Журналын (ЖЖ) кумдыкыштыжо блогым ышташ тыршеныт. Таче кечылан Школ деч вара ик участникын — Йошкар-Оласе «Чаша» тунемме рӱдерыште англичан йылмым туныктышо Татьяна Япаеван блогшо (http://lyavi-tachana.livejournal.com) шочын.
Илыше Журналын «шӧртньӧ посолжо», Липецк область гыч вӱдышӧ блоггер Алексей Логинов дене телекӱвар кужу жаплан шарнаш кодеш. Семинар-тренингыш толшо-влак тудлан пеш шуко йодышым пуэныт.
Логинов национальный блогосферым ышташ кӱлмӧ нерген ойлен, но тыгодым тыгай блогым кок йылме дене (мутлан, марла да рушла) вӱдаш темлен. Тудо Марий Элысе мотор вер-влак нерген интернет-лаштыкым ышташ гын, шуко лудшо лиеш манын, палемден.
«Конфликтым кораҥдымаш. Ой-кылым ыштымаш» теме дене тренингым Игорь Садовин оҥайын эртарен.
А одо блоггер Мария Векшина Удмурт Республикыште вияҥше блогосфере нерген палдарен. Тушто таче одо йылме дене 30 наре блог уло, тышеч 10 утлаже эреак уэмдалтеш. «Самырык-влак коклаште шочмо йылме дене возаш кумылан-влак ятыр улыт, тыгодым нуно интернет дене кылдалтше термин-влакым моткоч виян одо йылмыш кусарат. А одо блоггер-влакын никышт (интернетысе лӱмышт) илышыште кучылталтше псевдонимышкышт савырненыт», — каласыш Мария.
Школын пашажым «Национальный блогосфера: кызытсе пашаже да ончыко вияҥмашыже» теме дене «йыргешке ӱстел» мучашлен. Тушко Марий Эл Республикысе вӱдышӧ блоггер-влак ушненыт. «Йыргешке ӱстелым» блоггер, журналист, Марий Эл Республикысе тӱвыра, печать да калык-влакын пашашт шотышто министерствын пресс-секретарьже Иван Земцов вӱден.
Семинар-тренингын чыла участникшылан сертификатым кучыктымо.
Марий блоггер школ умбакыже шуйна. 22 майыште Марий кугыжаныш университетысе Калык тӱвыра да тӱвыра-влак кокласе кыл институтын 3-4 курсыштыжо ончыкылык финн туныктышо лияш ямдылалтше-влак дене Эльвира Куклина вашлийын. Тыге студент-влак ик мужыр жапыште финн йылме дене блогым ыштеныт. А вес кумда вашлиймаш «Ростелекомын» филиалыште июнь тӱҥалтыште лиеш. Тушко телемост гоч Юлкундемысе вӱдышӧ блоггер-влак ушнат.
Палемдыман: «Марий блоггер школ» икымше проект Республикысе тӱвыра, печать да калык-влакын пашашт шотышто министерствын «Марий Эл Республикысе 2013-2020 ийласе калык политик» кугыжаныш программыж гоч илышыш шыҥдаралтын.
