«Марий сандалык» журнал нерген ойлымо годым тудын «чурийже» — ончыл лаштык – нерген сайынрак шоналташ тыланымаш пурен.
Кумшо йодыш почеш, Шинчымаш кечын Мер Каҥашын еҥже-влаклан школлашке лекташ, йӧн лийме семын шочмо школыш миен толаш, тунемше да туныктышо-влак дене вашлийын мутланаш пунчалыч.
Тыгак Марий Элысе Кугыжаныш Погын вуйлатышын пресс-секретарьже Александр Петровлан Республикысе тӱвыра министерствын Таумутшым Михаил Васютин (вуйверын еҥже, республикысе тӱвыра, печать да калык-влак паша шотышто министр) кучыктыш. Таумут Регион-влак кокласе «Пеледыш пайрем» годым «Кудо» конкурсым шот дене виктарен колтымылан.
А тӱвыра министрын алмаштыже Галина Ширяева 3-4 сентябрьыште Петрозаводскышто эртышаш Финн-угор калык-влакын тӱнямбал конференцийышт нерген мутым нӧлтале. Тыге конференцийыш марий калык деч Галина Ширяева, Алёна Иванова, Фёдор Галкин (Марий Эл), Александр Гайсин (Пошкырт кундем) кайышаш улыт.
