«Такмак он» конкурсыш ушнынет – 4 сентябрьыште Чарла Кремльыште (Йошкар-Ола) вучена. Тушто черетан «Марий кас» лиеш.

Касым Медведево районысо тӱвыра пӧртын «Эр ӱжара» фольклор ансамбльже сӧрастара. Гармоньчо – Анатолий Ермаков, тӱмырзӧ – Виталий Кучергин.

А «Такмак он» конкурсыш таче кечылан 15 йодмаш пурен. Мутлан, Кужэҥер район Визым ял гыч кок мурызо да ик гармоньчо толаш шонат, Волжский район гыч «Чевер кече» фольклор ансамбль ушнынеже, Йошкар-Ола гыч «Весела сем» фольклор ансамбль ямдылалтеш.

«Марий кас» 18 шагат гыч 21 шагат марте шуйна. Ты гана тудо марий сем почеш кушташ гына огыл, а эше конкурсышто вийым тергаш ӱжеш. 3-4 куплет дене у, шке гыч шонен лукмо але кугезе кова-кочан шондыкшо гыч чылт палыдыме такмакым муын, мурен ончыктыман.

Пагален вучена! Шотыш налза, эн чолга-влаклан касым эртарыше Марий тӱвыра рӱдер пӧлекым кучыкта.