Кас мучко тӱрлӧ марий муро йоҥгыш, чолга артист-влак кумылым вӱчкышт. «Каче-влак» группо шке мастарлыкышт дене куандарышт. Республикысе марий тӱвыра рӱдерысе «У муро» вокал студийын самырык артистше-влак поро шӱлышым ешарышт. Мария Морозова, Виктория Тихонова волгыдо шижмаш нерген мурышт.

Мо оҥайже (тыгай эше ик дискотекыштат уке!): этнопайремыште кушташ гына огыл, а гитаре сем почеш ӱстелтӧрыштӧ каналташ, йолташ-влак дене мутым вашталташ лиеш. Гитаре дене кумдан палыме марий бард Геннадий Григорьев шокта. Тыге тудын сылне мурыж-влак ЭТНОPARY-ште чӱчкыдын йоҥгаш тӱҥалыт!

А этнокасым почмашке толшо икымше еҥым пӧлек дене палемдышт. Тиде Майя Терентьева лие. Кас мучко чолган куштышо еҥланат — Лариса Сидоркиналан — шыже аршашым вӱдышӧ кучыктыш. Палемдыман, тудым вӱдышӧ шке кидше дене ыштен!

Да, таче Йошкар-Олаште шуко вере марий дискотеке эрта. Мо дене у дискотеке ойыртемалтеш? Мутат уке, лӱмжӧ дене. Но эн тӱҥжӧ, ЭТНОPARY-ште марий да моло финн-угор йылме дене муро-влак йоҥгат. Артист-влакат тӱрлӧ йылме дене мурышо лийыт. Тыгак касыште «илыше» семӱзгар дене эреак шокташ тӱҥалыт.

Шушаш изарнян, 16 октябрьыште,  ЭТНОPARY Родо-тукым калык-влакын кечыштлан пӧлеклалтеш! Тӱрлӧ калыкын мурыж да куштымашыж дене палыме лийына!

Ушештарена! Вашлийме вер: «Чили» диско-барыште («Саварий» ост., кызыт «Йошкар-Олалан 400 ий лӱмеш парк» маналтеш). Тушто машинам шогалташ кумда вер уло, барыште моткоч тамлын пукшат. Кас 21 шагатлан тӱҥалеш да 2 шагат йӱд марте шуйна.