Кас 21 шагатлан тӱҥалеш да 2 шагат йӱд марте эрта. Кумылан-влак вич шагат эр мартеат каналташ кодын кертыт.

Вашлийме вер: «Чили» диско-барыште («Саварий» ост., кызыт «Йошкар-Олалан 400 ий лӱмеш парк» маналтеш). Тушто машинам шогалташ кумда вер уло, барыште моткоч тамлын пукшат.

ЭТНОPARTY- тиде калыкын муро да куштымаш пайремже. Дискотеке сынан. Кажне гана тӱрлӧ артист-влак куандараш тӱҥалыт. Ты гана кас шыже бал семын эрта. Тендан деке «Каче-влак» группо, бард мурызо Геннадий Григорьев, Марий тӱвыра рӱдер пеленсе «У муро» марий эстраде студийын изи шӱдыржӧ-влак да молат вашкат.

Оҥай, кумдан палыме руш композитор, поэт Булат Окуджаван мурыжо марла йоҥаш тӱҥалеш. Тыгак чылт у сынан диджей ден вӱдышӧ кас мучко куандарат.

Вес гана ЭТНОPARTY изарнянак, 16 октябрьыште, лиеш. Тудо Родо-тукым калык-влакын кечыштлан пӧлеклалтеш, сандене финн-угор сем почеш куштена.

Тӱҥ шонымашна: шочмо тӱвыранам, йылмынам аралаш тыршаш, калыкнан сай койышыжым койын мошташ, сылне муро поянлыкнам йырым-йыр шараш, шочмо элым йӧраташ мондаш огыл, икте-весе дене, тӱрлӧ калык, тӱрлӧ койыш-шоктышан, тӱрлӧ шонымашан еҥ-влак, келшен, ваш-ваш умылен илаш да, мутат уке, чон дене каналташ.