Мутланымашке Марий кугыжаныш университетын, Юл кундемысе кугыжаныш технологический университетын, И.С.Палантай лӱмеш тӱвыра да сымыктыш колледжын тунемшыже-влак ушненыт. Тыгак Финн-угор самырыктукым ассоциацийын, Российысе финн-угор студент ден аспирант-влакын ассоциацийыштын, Марий Эл Республикысе шке семын мурышо да шоктышо-влакын «Югорно» мер организацийыштын, Марий самырыктукымын «ВийАр» ушемыштын, Марий Элысе молодёжь инициативный группын да Республикысе Самырыктукым правительствын еҥышт лийыч.

Чумыргышо-влакым Финн-угор калык-влакын родо-тукым кечышт дене республикысе тӱвыра, печать да калык-влакын пашашт шотышто министрын алмаштышыже Галина Ширяева саламлыш. Тудо тиде кече-влаклан пӧлеклалтше мероприятий дене палдарыш, ӱдыр-рвезе-влаклан шке йылмыштым, тӱвыраштым аралаш, вияҥдаш, моло калык денат кылым кучаш тунемаш тыланыш.

Ӱдыр-рвезе-влакынат ойлышаш шомакышт ятыр ыле. Нуно, марий да моло финн-угор самырыктукым дене кылым кучен, пырля пашам ышташ кӱлмӧ нерген ойлышт.

Вес вашлиймаш 20 ноябрьыште лиеш, самырыктукымым куштымаште юмыйӱлан верже нерген ойлаш тӱҥалына.