Чылаже тӱрлӧ калыкын 17 мер ушемыштын ӱдыр-рвезыш у ассамблейыш пурымо да умбакыже пырля пашам ыштыме шотышто келшымаш ойпидышыш кидпалым пыштеныт. Марий тӱвыра рӱдер деч ассамблейыш «Рвезылык» студент ушем гыч колтымо еҥ Галина Ласточкина пурен.

Самырыктукым фестивальыште 10 калык шке тӱвыражым ончыктен, калык кочкыш ден палымым ыштен: марий когыльо, перемеч, мелна, кравец, пура; узбек пучымыш; армян кофе; татар губадья да т.м.

Самырыктукым флэшмобышто калык модыш дене модын. А концерт Марий Элыште илыше калык-влакын тӱвыра моторлыкыштым тӱрыс почын пуэн: марла, рушла, татарла, одыла, чувашла, азербайджанла, аварла, армянла, туркменла, украинла, таджикла мурымым да куштымым рвезе артист-влак ончыктеныт.

Тыгак фестивальыште калыкле-тӱвыра ушемын, тӱвыра коллективын, фольклор ансамбльын ӱшан еҥышт, посна мурызо да куштызо, кидмастар-влак лийыныт.

Самырыктукым фестивальын пашажым вораҥдареныт: Тӱвыра, печать да калык-влакын пашашт шотышто министерстве, Туныктыш да шанче министерстве, Самырыктукым виктер, марий, руш, татар тӱвыра рӱдер-влак. Фестивальын йолташыже-влак: Марий кугыжаныш университет, Юл кундемысе кугыжаныш технологический университет.