Марий тӱвыра кече Окружной калык тӱвыра рӱдерыште кугу пайрем дене почылтын. Марий Эл гыч толшо уна-влак Марий Эл тӱвыра министр Михаил Васютинын саламлыме мутшым каласеныт.

Сылнештарыше кидпаша мастар Леонид Григорьевын поснаончыш Салехард олаште илыше-влакым да родо-тукым финн-угор калыкым: хантым, ненецым, селькупым, марим, финным, коми-зыряным чумырен.

15 ноябрьыште марий калык вургем погыным тӱрлызӧ Ираида Степанова ончыктен. Тыгак йоча-влаклан «Марий тӱр тӱня» практик сынан урокым эртарен.

 Тиде кечынак кугыеҥ-влак «Марий касыште» каненыт. Касым вӱдышӧ Лариса Сидоркина марий муро да модыш-влак ден палдарен. Касым эртараш мурызо Зоя Берникова, гармонист-влак Александр Иванов да Эльвира Петрова, «Мурпеледыш» (Марий Эл) да «Марий кундем» (Салехард) фольклор ансамбль-влакын участникше-влак полшеныт.

 Касыш толшо-влак марий кочкышым тамленыт. Лӱмынак ямдылыме «Мелна руаш» кочмо-йӱмӧ вер пашам ыштен.

Окружной калык тӱвыра рӱдерын изи залыштыже да Ямало-Ненец автоном округ Приуральский районысо Аксарка посёлкышто «Марий куштымо сем» концерт эртен.