74 изи йоча да верысе воспитатель-влак модышын геройжо Окси кокам куанен вашлийыч. Тудо «Юзо мешак», «Кузе лӱмет?» «Поро кече», «Марий мут» модыш почеш шочмо йылмым палымым тергыш.

Кокалан полшаш Агытан да Рывыж лектыч. Марий календарь почеш, 2015 ийыште Агытан идалыкым Ӱшкыж ий алмашта. Агытан койышланен, йӱкшӧ дене куандарен кодынеже.Тудо «Кукареку мареку», «Мыланем веретым пу» модышла дене модыктыш, писын шонен моштымым да талылыкым тергыш.

Рывыжланат паша ситыш. Тудын сылнын мурмыжым йоча-влак совым кырен вашлийыч, куанен чыве муным шотлышт, янлык-влакын йӱкыштым палаш тыршышт.

Йоча-влак шотленыт, муреныт, куштеныт, модыныт, икманаш, марий У ийым вашлияш ямдылалтыныт. Марий тӱвыра рӱдерын пашаеҥже-влак тыгай вашлиймашым умбакыжат эртараш палемденыт.

Тыгай пайремым ышташ тенданат кумылда уло гын, Марий тӱвыра рӱдерыш йыҥгыртыза (8362) 45-88-51) — вашлийме нерген кутырен келшена.