Пытартыш жапыште Валерий Григорьев драматург семын койынак ойыртемалтеш. Йоча-влаклан пöлеклалтше пьесе конкурсышто «Йӱксӧ ӱдыр» произведений дене кумшо верым налын. «Марий драматургий» республик кӱкшытан конкурсышто кок гана «Ава шӱм» да «Эҥыремышвот» пьесе-влак дене кокымшо верыш лектын. Ятыр пьесыже «Ончыко» журналыште савыкталтын, «Юзо гармонь» (2013) тӱшка сборникыште лектын. Южым театрын сценышкыже лукмо. Шукерте огыл «Эҥыремышвот» икымше книгаже ош тӱням ужын. У савыктышышке вич произведений пурен: «Ава шӱм», «Ош йӱксӧ», «Эҥыремышвот», «Ял покшелне, клуб воктене», «Шоктесола пазар».

Валерий Помбеевич, умбакыжат усталык кумылда эреак нӧлталт шогыжо. У деч у кӱкшытым, сеҥымашым тыланена. Тек Тендам куандарат эн лишыл, йӧратыме еҥда-влак, эн ӱшанле йолташда-влак эреак ӱшанле кодыт, кеч-кунамат эҥертыш лийыт. Пеҥгыде тазалыкым, волгыдо да кужу-кужу илыш корным!

Уло кумыл дене, Марий тӱвыра рӱдерын коллективше.