Пайрем кышкарыште конкурс-влак эртеныт: «Эн сай У ий чием», «У ий модыш», «Йӱштӧ Кочалан серыш».

Йӱштӧ Кочалан 54 марла серыш пурен. Юксар тӱҥ школышто тунемше-влак серышым курыкмарла возеныт.  Иктешлымашым ыштыме годым серышын шкешотан улмыжым, стилистикыжым, чын возалтмым онченыт.  Конкурсышто Кадам тӱҥ школ гыч Валентина Кушакова сеҥен (туныктышо Зоя Александровна Беляева). Кокымшо верым Шернурысо 1-ше №-ан школ гыч Кирилл Орзаев (туныктышо Светлана Николаевна Глушкова), кумышо верым Йошкар-Оласе 7-ше №-ан школ гыч Дима Петухов (туныктышо Ирина Вячеславовна Закиева)налыныт.

«У ий модыш» конкурсышто кид ден ыштыме 62 модыш ончалтын. Тидын годым комиссий шкевуя ыштымым, моторлыкым аклен.  Тӱҥлан национальный колорит шотлалтын. Конкурсышто Шернур кундем Лажъял тӱҥ школ гыч Диана Волкова «Мамык кож» пашаж дене сеҥен. Кокымшо верышке Шернур кундем Марисола тӱҥ школ гыч Марина Лукиянова ден Медведево кундем Нужъял школ гыч Егор Соколов лектыныт.  Кумышо верыште Маритурек тӱҥ школ гыч Люба Афанасьева лийын.

Кож йыр марий вургеман ӱдыр ден рвезе-влак пӧрдыныт: Йошкар Упш, Нӧнчык патыр, Лумӱдыр, Лумэрге, Пампалче, Мотор ӱдыр да чодырасе моло янлык. «Эн сай У ий чием» конкурсышто 1 верыш Йошкар-Оласе 30-шо №-ан школ гыч Диана Павлова лектын, 2 верыш – Волжск кундем Сотнур тӱҥ школ гыч Глеб Александров да Марий Турек кундем Арбор тӱҥ школ гыч Лиана Семенова, 3 верыш Параньга кундем Лажмарий тӱҥ  да Йошкар-Оласе 2-шо №-ан школ гычНикита Самарин.

«Теле йомак» У ий пайремым Тӱвыра, печать да калык-влакын пашашт шотышто министерствын полшымыж почеш Марий тӱвыра рӱдер эртарен. Спонсор полышым «Кугарня» газет редакций (директор — тӱҥ редактор Михаил Матвеев), «ОНА» фирме (директор Нина Орман) пуэныт.

Шушаш У ий пайрем дене!