Команде-влак икмыняр пунктым эртышт. Тӱҥалтыште палаткым шогалтышт, вара краведений дене шинчымашыштым ончыктышт, умбакыже эҥгекыш логалше еҥлан полшышт, вер-шӧрым пален моштымыштым ончыктышт, гранытым кышкышт, тулым ылыжтышт.
Команде-влак иктӧр кайышт. Мучаште гына «ОПК» тулым ылыжтымаште тӱрлӧ йӧным кучылт моштымыжым ончыктыш да икымше верыш лекте.
Ӱдыр-рвезе-влаклан Республикысе марий тӱвыра рӱдер деч таумутым да пӧлек-влакым кучыктышт. Чыланат весела кумыл дене тунемме верышкышт кудальыч. А южышт «Зарница» модыш дене икымше гана модыныт. Тидыже нуным утларак кумылаҥдыш.
«Зарница» республикысе военный патриот модышын организаторже-влак: Республикысе марий тӱвыра рӱдер, «Азимут» йоча-самырык рӱдер, Марий Эл Республикысе тӱвыра, печать да калык-влакын пашашт шотышто министерствын, туныктымаш да шанче министерствын полшымышт дене.
