ЙОЧА-ВЛАКЛАН ПАЙРЕМЫМ ЭРТАРАШ ПОЛЫШ.
Вячеслав Осипов «Марий мланде – сылне вер…». Мурпогыш 12 муро пурен, тышечын 7-ше марла: «Шайра мланде – сылне вер», «Шыже вальс», «Шыргыжале шыже», «Куан», «Кисажат пала», «Изи сӱретче», «Эрдене». Тыгак Осиповын йоча муро-влакшым «Муро» дискыш погымо.
Шорыкйол, Ӱярня, Кугече пайрем ното дене возымо муро-влакым «Марий йӱла пайрем муро-влак» сборникыш чумырымо.
ТӰВЫРА, ТУНЫКТЫШ ПАШАЕҤ-ВЛАКЛАН ПАШАШТЕ КУЧЫЛТАШ.
Ольга Калининан «Марийские праздники. Марий пайрем-влак» рушла-марла полшык (справочник). Савыктышыште у пайрем-влак: Марий Талешке кече, Марий тиште кече, Пеледыш пайрем — нерген ойлалтеш.
Марий йӱла ден у пайрем-влакым эртараш возымо сценарий-влакым «Полышкид» (Рука помощи) сборникыш чумырымо: Ӱярня, Семык, Агавайрем, Сӱрем, Шинчымаш кече, Марий талешке кече, Тиште кече, Сеҥымаш кече, Пеледыш пайрем.
Марий калыкын тӱня умылымашыже, йӱлаже, эртыме корныж нерген Александр Таныгин «Ший мундыра» книгаштыже каласкала. Тыгак марий патыр: Пашкан, Чоткар, Тӱканшур, Полтыш, Акпатыр, Мамич Бердей дене палдара. Посна верым кызытсе жапыште юмыйӱлам шуктен шогышо онаеҥ-влаклан ойыра.
Вячеслав Мамаев «Марий юмыйӱла да пайрем-влак» книгашкыже марий Юмо радамым, кумалме радамым, кумалтыш-влакын тӱрлӧ лиймыштым, пайрем модыш-влакым, марий калык кочкыш, родо-тукым кыл нерген шымлымашым пуртен. Савыктыш туныктышо-влаклан урокым эртараш, а тунемше-влаклан шке шинчымашыштым шараш полшен кертеш.
МАРИЙ ЙӰЛАМ ИЛЫШЫШ ПУРТЫМО ПАШАШТЕ ПОЛЫШ.
Сорта чӱктыш кечын тоштыеҥым уштымаш радам дене «Ото» книгаште лудаш лиеш. Тыгак тыште Александр Таныгин тоштыеҥын ойжо дене палдара.
Александр Таныгинын чумырымо «Ош сандалык ончылно» кумалтышмут книгаште марий калыкын кечышотшо, пайрем кышкарже, пӱртӱс пагытым ончыктышо календарьже да киндым шындыме, узыпкам пукшымо, армийыш ужатыме, сӱан годым пелештыме мутшым савыктыме.
КАГАЗ ВИКТЫШ СОМЫЛЫМ МАРЛА ШУКТЫШО-ВЛАКЛАН.
Иван Ивановын «Кагаз виктыш сомылым марла шуктышо-влаклан полшык» («Пособие по делопроизводству на марийском языке») марла да рушла возымо савыктышыже. Тышке кагаз виктарышын мутержым, чаплӱм-влакым, тӧнеж ден ыштыквер-влакын лӱмыштым, марла возымо документ-влакым (йодмаш, ойвозыш, ӱшандартыш, инандыш, кидпыштыш, шӱдымаш) чумырымо.
Толза, книга-влакым Марий тӱвыра рӱдерыште налаш лиеш.
