Медведево районысо Мер Каҥаш активын пашаж дене мер пашаеҥ, туныктышо Римма Чендемерова палдарыш. «Медведево районышто мероприятий-влакым эртарымашке кеч-могай калыкат уло кумылын ушна, тӱрлȫ калык ваш-ваш полшен ила. Айдеме шочмо мландыже, шочмо калыкше деч ойырлен, нунылан тупынь шогалеш гын, шкенжынат вий куатше, эрыкше да усталыкше пыта, маныт. Садлан, айдеме айдемак кодшо манын, меат, Медведево районышто илыше-влак, шочмо йылмынам, илыш-йӱланам арален кодашак тыршена. Кодшо ийын марий шӱлышан ятыр фестиваль, конкурс, концерт район кȫргыштȫ, тыгак республик кӱкшытыштат эртаралтыныт. Чыла тидым эртараш клуб, школ, библиотеке пашаеҥ-влак, администраций кугу надырым пыштат», — палемдыш чолга ӱдырамаш.

Вуйвер погынымаште кокымшо карталлан паша кышкарым пеҥгыдемдышт. Лишыл жапыште, 24 апрельыште, Марий форум вуча.