Касым вӱдышӧ Денис Очиев куштымаш коклаште модышымат эртарен. Эн чолган да веселан кадыргылшылан «Эреҥер» ансамбльын концертышкыже билетым кучыктен. Кас шочмо кечыланат поян лийын:Марий тӱвыра рӱдер тиде кечым пайремлыше-влакым пӧлек дене палемден.

Касыште Пошкырт да Удмурт Республикыла гычат уна-влак лийыныт. Нуно верысе марий-влак дене пырля мурен-куштен моштымыштым ончыктеныт.

Черетан каныме кас Чарла Кремльыште 1 сентябрьыште лиеш. Ты кечын Марий тӱвыра рӱдер «Таче – тунемаш, эрла – канаш» дискотекыш чыланыштым ӱжеш. Тудо у тунемме ийлан пӧлеклалтеш. Калыкын йӧратыме мурызышт Вадим Краснов, Роза Искакова, Анатолий Зарецких, Станислав Устюгов да М. Шкетан лӱмеш Марий кугыжаныш драме театрын самырык артистше-влак весела кумылым пӧлеклат.