Жап шагал эртен гынат, самырык мер толкын шуко мероприятийыште участвоватлен. Ӱмаште Шочмо йылмын тӱнямбалсе кечыжлан видеороликым ямдылен. Тушто марий, руш, татар, армян до молат шке шочмо йылмышт дене кугешнымышт нерген каласеныт.
Йошкар-Олаште “Продлёнка” рӱдер пашам ышта. Тудын инициативный тӱшкажым самырык рвезе Александр Окольников вуйлата. Рвезе руш калык модыш-влакым угыч илышыш шыҥдара. Ӱмаште икымше гана “Богатырская заставам” эртарен. Теният тидым ышташ шона.
— Таче калык коклаште шарлыше модыш-влак дене уремыште модмо годым от сеҥе гын, компьютерым чӱктен тидым ышташ лиеш. Садлан мый ожно гына вашлиялтме модыш-влакым шымлем. Тудым интернетыште муаш огеш лий, — каласен самырык еҥ.
Тыгак калык модыш-влак дене пашам “Царёв город” ушем ышта. Тудо Йошкар-Оласе “Динамо” стадионышто калык модыш пайрем-влакым эртара. Ты кок организацийын еҥже-влак министр М. З. Васютин деч полышым йодыныт.
Ӱмаште 23 ноябрь гыч 1 декабрь марте Калуга областьыште “Диалог культур” молодёжный этнокультурный лагерь пашам ыштен. Тушко республикына гыч икмыняр самырык еҥ миен. Нунын коклаште Республикысе марий тÿвыра рÿдерын методистше Татьяна Япаева лийын. Этнолагерь “Этномир” тӱвыра да образовательный рӱдерыште эртен. Тиде моткоч кугу комплекс. Рӱдерыште выставочный комплекс пашам ышта. Тушто шуко калык тӱвыра, сымыктыш да йылме нерген пален налаш лиеш. Тиде мероприятийыште самырык ончылен-влак проектым возаш тунемыныт да туштак возымо проектышт дене палдареныт. Нунын дене Федеральный агенствын по делам национальностей, Московский высший школын да моло образовательный да научный заведений-влакын тун специалистше-влак пашам ыштеныт.
— Тыгай комплексым кажне ужшаш. Ме пуйто уло тӱням шымлен лектынна, — каласкален Т.Япаева.
ПГТУ пелен “Мост” тӱрлӧ калык гыч лекше студент-влакым ушышо клуб пашам ышта. Тыгак ты тушто “Ассоциация иностранных студентов” уло. Тудым чолга рвезе Руфат Азизов вуйлата. Ассоциаций радамыште 600 наре самырык еҥ уло. Студент-влак тӱрлӧ мероприятийыште участвоватлат, флешмоб-влакым эртарат. Кажне ийын ПГТУ-што “Мост дружбы” фестивальым лач ты кок организаций эртарат.
“ВийАр” тӱвыра да келшымаш кыл ушемым таче Николай Любимов вуйлата. Рвезе министрлан ушемын ӱмаште ыштыме да ончыклык пашаж нерген каласкален.
— Те самырык-влакым шке почешда наҥгаеда, вияҥден шогеда. Тендан деч посна самырык мер илыш йомеш, — доклад-влакым колыштмеке, акым пуэн М.Васютин.
Тудо министерствын тауштымашан серышыж дене эн тале активист-влакым палемден. Нунын коклашке Татьяна Япаева логалын.
