Йоча-влакым модыш программе вучен. Пайрем «Марий йÿла чоныштына ила» квест-модыш гыч туналын. Тушто Ӱшнÿр кыдалаш школын тунемшыже-влак сененыт.
Уремыште йоча-влакым Ӱярня кува ден Ӱярня кугыза вученыт. Нуно икшыве-влакым ваш палымым ыштеныт, курыкыш мунчалташ ÿжыныт. Тÿрлӧ таҥасымаш: «Шукыйол», «Маскайол», «Якуп пашкар» пайрем кумылым нолтеныт. Тыгак чылан «Карта» модыш ден модаш тунемыныт. Ордыжто кугурак-влакат кодын огытыл, йоча семын модыныт.
Кажне школ команде «Ӱярня кува-2016» конкурслан ямдылалт толыныт, мурен, куштен, почеламутым лудын араленыт. «Ӱярня мелна-2016» конкурсышто сийышт дене палдареныт гын, «Ӱярня такмак-влак» конкурсышто сылне лудышмуро-влакым йоҥгалтареныт.
«Ӱярня кува» конкурсышто сеҥыше-влак:
1-ше вер – Ӱшнÿр кыдалаш школ;
2-шо вер – Тошто Крешын тÿҥ школ;
3-шо вер — Йошкар-Ола Семеновка селасе 21-ше №-ан кыдалаш школ.
«Ӱярня мелна» конкурсышто сеҥыше-влак:
1-ше вер — Морко поселкысо 1-ше №-ан кыдалаш школ;
2-шо вер – Роҥго кыдалаш школ;
3-шо вер – Шойбулак кыдалаш школ.
«Ӱярня такмак-влак» конкурсышто сеҥыше-влак:
1-ше вер – Кузнеч тÿҥ школ;
2-шо вер – Кугунур кыдалаш школ;
3-шо вер – Упшо тÿҥ школ.
Республикысе марий тўвыра рўдер пеленсе «Чон оҥгыр» фольклор ансамбль сылнын мурымыж дене кумылым нӧлтен. Верысе кидмастар-влак Виталий Николаевич Кудрявцев да Зинаида Павловна Волкова шке ыштыш-кучышыштым ончыктеныт. М.Шкетанын тоштер-пӧртын вуйлатышыже Лидия Николаевна Кудрявцева писательын сурт-печыж дене палдарен. Пайрем туныктышо, йоча, лишыл яллаште илыше калыкым иквереш чумырен.
Республикысе марий тўвыра рўдер Тошто Крешын тўҥ школын коллектившылан пайремым эртараш полшымыжлан таум ышта.
Пайрем дене! Ўярня йор-йор-йор!
Пайрем дене! Мелна чыж-чыж-чыж!
