22 мартыште Советский районысо Кукмарий да Ӱшнӱр кыдалаш школлашке «Марий Эл» газетын усталык десантше миен. Писатель Валентин Осипов-Ярча да журналист Михаил Скобелев дене пырля поэзий да сем урокым эртараш Марий тӱвыра рӱдерысе «У муро» студийын вуйлатышыже Г.Григорьев полшен.
24 мартыште Роҥго селасе тӱвыра пӧртыштӧ В.Абукаев-Эмгак лӱмеш премийын лауреатше Надежда Васильеван «Мый шошын ӱдыржо улам» усталык касше лиеш. Поэтесса Марий тӱвыра рӱдер пеленсе «Югорно» клубын да Марий кугыжаныш университетысе «Поэзий шепкаште» кружокын еҥже.
Касым сӧрастарат: Альберт Васильев, Геннадий Григорьев, Алена Яковлева, Татьяна Денисова, Володя Матвеев, Надежда Пашкина, Надежда Андреева. Мурызо-влак Надежда Васильеван почеламутшо почеш возымо муро-влакым йоҥгатларат.
