25 мартыште Йошкар-Олаште мер политик рӱдерыште марий юмыйӱлам вияҥдаш тӱҥалмылан 25 ий теммылан  пӧлеклалтше «Ший мундыра» республикысе форум эртен. Тушко районласе «Марий кумалтыш» погынын вуйлатышышт погыненыт.

Форумын пашаштыже Марий Эл Республик Виктер вуйлатышын алмаштышыже, тӱвыра, печать да калык-влакын пашашт шотышто министр Михаил Зиновьевич Васютин, Марий Эл Республикысе Кугыжаныш Погын вуйлатышын алмаштышыже, марий Оньыжа Анатолий Николаевич Иванов, Марий Эл Республикысе марий тӱвыра рӱдерын вуйлатышыже Наталья Васильевна Пушкина, Меркаҥашын еҥже Анатолий Ильич Радыгин,Татарстан Республикын тӱҥ онаеҥже Олег Александрович Третьяков лийыныт.

Форумым Шернур районысо Марий кумалтыш погынын вуйлатышыже Вячеслав Михайлович Мамаев вӱден. Марий юмыйӱла ушемын эртыме корныжо дене юмыйӱла пашам виктарыше, Марий тӱвыра рӱдерын методистше Галина Алексеевна Ласточкина палдарен. Тыгак ушемын 2015 ийыште эртыме да 2016 ийыште ыштышаш паша радамжым лончылымо. Икмыняр онаеҥлан тӱрлӧ кӱкшытан чапкаҥазым кучыктымо.

Форум шке резолюцийыштыже пунчалын: «марий юмойӱлам марий калыкын тӱҥ кучемжылан шотлаш»; «онаеҥ-влакын шымлыме пашаштлан кугыжаныш кучем деч полышым йодаш»; «самырыктукымым кугезына-влакын сугыньышт почеш шуараш».