«Пеледше тукым-2016» — республикысе йоча усталык конкурс. Тудым Марий тÿвыра рÿдер кок ийлан ик гана эртара. Республикыштына Йоча усталык дене кылдалтше конкурс-влак коклаште ик эн ончыл радамыште шога.

Конкурсышто муниципал этапыште сеҥыше-влак участвовалтеныт. Йошкар-Ола да республикынан 12 районжо гыч 110 йоча 73 кугыеҥын (воспитатель, музыкальный туныктышо, ача-ава-влакын) полшымышт дене йомак-влакым модын ончыктеныт. 

Икшыве-влак гына йомакым ямдылен огытыл, нунымат тыгаяк сынан программе вучен. Мераҥ, агытан да рывыж моткоч веселан пайремым вÿденыт. Икшыве-влак шкеныштым сценыште чолган кученыт. Кажне йочасадын модмыжо шкешот дене ойыртемалтын. Южышт текстым монден шогалыныт гынат, йомын огытыл, шкеак иктажым ойленыт але воктен шогышышт полшеныт. Жюрилан аклыме годым куштылго лийын огыл. Жюри председатель Республикысе тÿвыра рÿдерын вуйлатышыже Н.Пушкина лийын. Тудлан Я.Эшпай лÿмеш Марий кугыжаныш филармоний вуйлатышын алмаштышыже А.Речкин, «Ямде лий» йоча-влаклан газетын алмаштышыже А.Эманова да Республикысе курчак театрын тÿҥ режиссёржын алмаштышыже Э.Лисицина полшеныт.           

«Йомакын авторжо» номинацийлан 34 автор деч 38 паша пурен. Нунын кокла гыч эн оҥайже-влакым гына палемдыме:

1 вер – В.Корчемкина, У Торъял посёлкысо «Теремок» йочасад;

2 вер – Г.Максимова, Шернур район Марисола кыдалаш школысо подготовительный группын воспитательже;

3 вер – Н.Турецких, Оршанке район Кугунур селасе «Изи мÿкш» йочасадын воспитательже.

Сценыште йомакым модын ончыктеныт гын, школын кокымшо пачашын фойештыже «Калык вургеман курчак» ончерым ямдылыме. Тушко 162 курчак пурен. Нуным кугыеҥ-шамычын полшымышт дене 157 йоча ямдылен. Курчак-влак кокла гыч эн сайжым палдыме:

1 вер – У Торъял район Кугу Овалжысе «Шонанпыл» йочасад;

2 вер –Йошкар-Оласе 67-ше №-ан «Колокольчик» йочасад;

3 вер – У Торъял посёлкысо «Улыбка» йочасад.

Кумылаҥдыше дипломым У Торъял посёлкысо «Теремок», Шернур район Лажъялысе «Ший оҥгыр», Параньга район Матародысо «Йомак» йочасад-влаклан да Шернур районысо Марисола кыдалаш школын подготовительный группыжлан кучыктеныт.     

«Пеледше тукым» республикысе йоча усталык конкурсышто сеҥыше-влак:

1 вер – Звенигово оласе «Звёздочка» йочасад;

2 вер – Волжский район Сотнур посёлкысо 3-шо №-ан «Пеледыш» йочасад;

3 вер – Кужэҥер посёлкысо 3-шо «Колосок» йочасад.

Кумылаҥдыше дипломым Йошкар-Оласе 61-ше №-ан «Теремок» йочасадлан кучыктеныт.

Икымше-кумшо верым сеҥен налше-влакым грамот да пӧлек-влак дене палемдыме, чылаштымат сертификат, таумут вучен.

«Пеледше тукым» конкурсын эше ик ойыртемже, кӱкшытшӧ – кажне участник мотор марий вургемым чиен. Нуно чынак пеледше тукымын пеледышышт улыт.