Марий Эл Республикын тÿвыра, печать да калык-влакын пашашт шотышто министр М.Васютин Марий калыкын Х погынжын кÿлешлыкше нерген палемден. Марий Эл Республике деч Кугыжаныш Думын депутатше Л.Яковлева Российысе марий калыкын национально-культурный автономийжын пашаж дене палдарен.

Пермь олаште шукерте огыл «Пермь марий-влак: тÿвыра да историй» книга лектын. Тудым «Пермьысе марий национально-культурный рÿдер» луктын. Ты рÿдерым Р.Попова вуйлата. Тудо делегат-влаклан да министр М.Васютинлан книгам пӧлек семын конден.

Корно да пленум деч вара уна-влакым каныш программе вучен. М.Шкетан лÿмеш марий кугыжаныш драме театрыште «Юмынÿдыр» мюзиклым шынденыт. Йоча да самырык-влаклан театр-рÿдерыште «Немыч вате» комедий калыкым куандарен. А «Вашлиймаш касыште» чыланат, ваш пайрем дене саламлен, куштеныт да муреныт.