«Усталык» – тиде шукерте огыл мураш тÿҥалше-влакым, самырык поэт да композитор-шамычым ушен шогышо лабораторий. Программе почеш нунылан «Композитор мастарлык», «Почеламут да мурым возымаш практикум», «Вокалын техникыже» секцийлаште мастар-классым эртарыме. Россий писатель ушемын еҥже Альбертина Иванова мурылан йӧршӧ почеламутын чоҥалтмыж нерген каласкален. Марий Эл Республикысе композитор ушемым вуйлатыше Валерий Кульшетов семым возымо годым мом шотыш налаш кÿлмӧ дене палдарен. Олык Ипай лÿмеш кугыжаныш премийын лауреатше Светлана Яндукова мурымаште йÿкым чын кучылташ туныктен.  

«Тачысе марий эстрадын проблемыже-влак» йыргешке ÿстелыште ÿчашымаш лийын. Тушто тачысе муро-влакын качествышт нерген ойленыт. Тидын верчын профессионал мурызо да композитор-влакын чонышт «коршта». Марий Эл Республикысе композитор да писатель ушемла пелен комиссийым погымо нерген каҥашеныт.

«Усталык» творческий лабораторий умбакыжат пашам ышташ тÿналеш. Май тылзыште черетан погынымаш лиеш.